مرحبا بكم في كتابات
   
عدد القراءات : 2339
تقارير
آراؤهم
ثقافة

تزوج من ثانيه : وتميز !

الجمعة، 17 آب، 2012

نغمات الموبايل، تدل - غالبا - على ذوق صاحبه ،إضافة الى درجة الصوت فيه.

 گاعدين بفاتحه، وطب علينه سيد، من ذوله اللي ما مصدگين هم من ( خلفة ) النبي (ص)، لذلك فهو : يضع على رأسه كوفية خضراء ، وعلى كتفه كوفية خضراء كبيرة ومزركشة، و محزم بوصله خضره، ولابس دشداشه سوده، وعگاله أسود ولحيته سوده، وهو أبيض : گطن !  انتبه الى دخوله أحد أولاد عمومته وهو رجل من العقلاء فقال :
" إچاكم العباس أبو فاضل ! "
ضحك الجميع بصوت مكتوم، فالجميع يخافون ( شارة ) السيد، الذي بامكانه - بحسب والدي - أن : يموع الحديد ( بكسر الحاء طبعا ) !

حينما رن موبايل السيد الذي يشبه العباس أبو فاضل ، كانت النغمه بصوت عال جدا :
" لسه فاكر ئلبي يديلك أمان.. وله فاكر كلمه
ح تعيد اللي كان .. ولا ... "

الشركات المنتجه للموبابلات، تجري بحوث كثيره لتختار النغمات التي تضعها في هواتفها المحمولة، وهاي النغمات تناسب جميع الاذواق، وتدل على الرقي.

بالنسبة لي، أضع في هاتفي نغمة ( صوت الزجاج ) بصوت هادئ مع الهزاز، اليوم رن هاتفي قبيل الفطور بنصف ساعه :

تن .. تن .. تن .. تن
- ألو
- أنو ( هي : كبدبد )
- شلونچ ؟
- هلاو، شونك، مشتاقتلك بذات !
- هلو .. هلو .. شلونك أبو علي شلون صحتك !!!
- هاي شنو لازم إجه يمك أحد ههههههاي
- إي والله ، شنسوي بعد !
- ههههههاي شوف : آني عازمتك، مسويتلك فطور خاص : تشريب بانيه ولحم ضلوع، وسالگتلك فروجه زغيره، وتمن باگله وروبه، وشوية تمن طماطه، ومحلبي، وكاسترد، وشوربة، وشوية هريسه، وشاويه سمچه زغينونه وعليها حشو يجنن، وزلاطه خضره، وحمص بطحينه وفتوش، وسلطة زيتون، ومايونيز، وتبوله، وجايبتلك تحلي بكنافة جبن خشنه وناعمه، وكنافه بالگيمر، على بقلاوه، وزلابيه ، وبرمه، تحب البرمه ؟ أني أموت عليها، وشوية زنود الست، ولقمة القاضي، سويتلك عصير نومي بصره، أعرفك تموت ع البصره هههههه، وعصير تمر هند، وحسام جابلنه عصير زبيب طبيعي، وگلت يمكن تحب قمر الدين، بردتلكياه بالفريز وي عصير البرتقال الطبيعي وعصير الڤيمتو اللي تحبه، بس تدري حتى لا أنسى : إنت تحب لبن أربيل هذا المدخن آني أموت عليه، راح أحضره إلك تفطر بيه وي ( شعثة ) التمر بالدهن الحر والسمسم، أگلك إنت تدخن ماليبورو سحب لو تحب أحضرلك نرگيلة أناناس بحريني ؟ الو إنت ويايه ؟
- أي وياچ ؟
- وأريد أگلك شغله بس لا تاخذ عليه غير نظره، إنت ما قاري بالقرءان الآيه اللي تگول :
" أحل لكم ليلة الصيام الرفث الى نساؤكم " ؟
- أي قاريها ؟
- زين يعني تعرف تقرا !!
- إي
- إنت وين هسه أشو متحچي، مخلوس شنو ؟
-  آنه ببابكم ، فتحيلي الباب بسرعه !

في أمان الله

 
تعليقات الفيسبوك
تنويه لابد منه : ايمانا بشعارها ( الضمير رقيب الكاتب ) " كتابات " غير مسؤولة عن محتوى تعليقات الفيسبوك المنشورة في موقعها .. ولا تعبر بالضرورة عن رأي إدارتها ويتحمل كٌتَاب التعليقات المسؤولية الأخلاقية عن محتوى تعليقاتهم .

Designed by : Enana.com
enana
Programed by : Jasmineshost.com
JasminesHost
كتابات لاتتحمل أية مسؤولية عن المواد المنشورة , ويتحمل الكتاب كامل المسؤولية عن كتاباتهم التي تخالف القوانين أو تنتهك حقوق الملكية أو حقوق الآخرين أو أي طرف آخر.