الكتابات المنشورة تعبر عن رأي اصحابها
3 تموز 2008
|
|
الكتابات المنشورة تعبر عن رأي اصحابها |
||
|
3 تموز 2008 |
|
لعبان نفس
كتابات - حمدان العبل
لعبت نفسي بصراحة، شنو السالفة؟ تفتح" كتابات" فتتمنى الموت –على اساس احنا عايشين- ..هوسة وما تعرف رجلها من حماها..! كل واحد يجر بصفحة.. أمير المگاميع يحتقر المثقفين خلط بالصد وأسبابه معلنة، وخالته الحجية ... متعرف شتريد يومية شكل: يوم صدرية ويوم بدرية ويوم أمريكية تسافر وي الامريكان بالطيارة وتلتقي بقياداتهم ويوم تهاجمهم.. يابه قابل انتي نوري السعيد الله يرحمه اللي كان يبرر لقاءاته بالانگليز وتعاونه وي مخابراتهم على أنه ذكاء سياسي للخلاص من الاحتلال ونيل الاستقلال التام أو الموت الزؤام؟ وتاليها جرجروه العربنچية الله لا يوفقهم وسحلوه بشوارع بغداد وگصبوه تگصب، شاعرنا البصراوي شمع الخيط وگلب بالدخل ورجع خط مايل باسم "هامل هامل".. أما خضير طاهر فبطل التحرير القومي.. يخون الجميع وينادي كل من هب ودب على انه المنقذ الوحيد للعراق فهو الشريف الوحيد في الشعب العراقي مع انه أمريكي بحسب جوازه وجنسيته ولا أعرف كيف يستنجد بمدير المخابرات التابع للحكومة التي يهاجمها لكي يحميه ولا يستغيث بحكومته الامريكية التي لا تتخلى عن مواطنيها مهما كان السبب خاصة اذا كانوا في بلد غريب وبعيد مثل العراق، فخضوري يشتم السنة والشيعة –الكل مو الاحزاب والميليشيات التي صادرت الناس- ويناگر الشيوعيين اللي حكموا العراق من 1963 الى 2003 بالنار والحديد ويتهمهم بالعمالة للاتحاد "الچبيحي" والمخابرات السورية والايرانية.. هيچ بكيفي.. طبعا ما عاجبه من هالهوسة بس المذيعة زينة الآلوسي.. هاي شنو داد ابو زياد.. ديرقّم ع النت الأخ..! وعشتار العراقية التي أقدر تشخيصها للمشكلة في "الاحتلال" تشطح احيانا لأن البيها ميخليها فتردح للأكراد نيابة عن نرمين المفتي.. هسا تگولون ليش تحجي على خضير وانت تعد للكل.. فاگول: آني دا عد للبعض من اللي يكتبون بكتابات مو كلهم.. ماعلينا.. شلش وشلع من كتابات بعد مالعبت نفسه –والقرآن هو گلي- وداعيكم "حمدان العبل" نايم بالخونة –الخونة بسكون الخاء مو بفتحها يمعودين- لأن الاغاني القديمة اللي دا أرهمها على عزاوي وعموري لاقت استحسانا كبيرا –إحم- يقابله استهجان واضح يقول: لويش يابه متكتب على عدنان الهزاز وعلف الخريان وصاطح المطبگ –بالمناسبة آني كلش فرحان لأن عرفت شلون أكتب الـ"گـ" والـ " چ" بدل الـ "كـ" ابو الفتحة والـ"جـ" ابو السدة، ولهذا كل شوية أكتبهن.. أصلاً أدورهن دوارة على عناد البصراوي.. اللي بقيت ادور على كتاباته بالمواقع الاخرى فطلعولي جماعة جديدة.. هالنوبة طلعولنا جماعة "ثورة الحب الإلهي" والله خوش سالفة جديدة تذكرني بحركات الهيبيز بالستينيات والسبعينيات والحركات الروحية الاميركية اللي جتي لهم من الهند ذيچ الايام.. بستر خواتكم دلوني وين صايرين هذوله.. صحيح بحي البنوك؟ والله من عين باچر أشيل لحي البنوك بلكي نتعرف بفد "حاته" تؤمن بالحب الإلهي، كما يقول المفكر الخطير حاتم العراقي، طبعا ماكو فرق بس حرف واحد بين حاتة وحاتم.. ربك يسرها. نرجع لسالفتنا.. أخونا الطبيب فواز الفواز هم تريد توگع على ميه شيريد.. بلا فايدة.. وما تعرف شنو السالفة.. معقولة كلنا مضيعين صول چعابنا؟ ومثله عبدالله الهاشمي وعبدالله الشمري وعبدالله الفطير – تره براءة الاختراع مال عبدالله الفطير مالتي مو تگولون-.. عبيدالله هؤلاء بس ينگطون سم وحقد ويدسون.. إي ليش بابا ليش؟ مو تگولون إحنا عراقيين.. يعني يعجبكم التقسيم حتى نحتار شلون نسوي ممر آمن من الفضل للحيدرخانة؟ كافي عاد مو ثخنتوها. ومن هالمال حمل جمال: ابو محمد الانصاري وحسين السعدي –مو المطرب اللي لحن لاخبر الله يرحمه- والگرعاوي وصاحبنا ابو "اياد الزاملي أسلم تسلم" وشاعر آل الحكيم وجنجلوتيته في مدح آل "البيت" الطباطبائي.. يابه مو عدكم فضائيات وجرايد.. شكو لاحگينا على "كتابات" بعربانة مال نفط.. إسليمة أي والله. اما عزيز الروح خميس مشيط الوردة فعلى راسي بس لو أعرف ليش حاط نگره من نگر الاستاذ ضياء الشكرچي؟!.. كسر بجمع لعبان نفس لكن من تقرأ كتابات وتتواصل مع رئيس تحريرها –لو آني چان صارت عندي جلطة- ترجع تگول ياجماعة ميصير هالشكل. وعذرا ممن فاتنا أن نذكر أسماءهم ضمن قائمة المقالات اللي تلعب النفس. لأن اكو جزء ثاني بس مو جزء "خاله".
|