الكتابات المنشورة تعبر عن رأي اصحابها
3 حزيران 2008
|
|
الكتابات المنشورة تعبر عن رأي اصحابها |
||
|
3 حزيران 2008 |
|
عولمة بالدهن الحر البقاء في حياتكم جميعا!!
كتابات - وجيه عباس
لقد مات ليلة أمس،ودّع الدنيا تشيّعه الدنيا بعطورها،والدشاديش بخيوطها،والعيون المغلّفة بالـ(المسكارة)تهطل دموعها الممتزجة بالألوان البنفسجية...والتأوهات النسوية التي ستخفت عند أول عناق مع أي زائر ليليّ يحضر للعزاء وقراءة أي شيء على روح المرحوم...ربما سيقرأ أحدهم فاتحة الكتاب أو مزمور في وسط التوراة أوخاتمة الأنجيل في أسوأ الحالات.....ربما سيلطمون عليه في حسينيات الشانزلزيه في باريس ...ثقوا أنهم هناك لن يقولوا أنها تشابيه محرّمة،لأن اللاطم والملطوم عليه لم يتهمهم أحد المشعانيين الجبوريين أنهم صفويون يصلون على محمد وآل محمد!!،وربما سيضرب البعض درباشته فيقوم من شدة حزنه بإدخال السيوف أو الخناجر أو حتى يصل الحزن بأحدهم مأخذاً فيقوم بإلتهام فناجين الشاي،ولن يقولوا عليهم هناك أنها خزعبلات يقوم بها بعض السلاجقة القدامى لأنهم يصلون على محمد ويتركون الصلاة على آله، ربما ستلقي بعض النسوة عباءاتهن وملابسهن الساترة للرمان والتفاح الأجنبي فوق جنازة السيد المرحوم الذي ورد الى قبره ليلة أمس يوم مرت من أمامهن وهن يتقاطرن بالدموع المعطّرة على صاحبهن الذي علّمهن السحر الحلال والحرام في آن واحد... لسعني سوط الحزن وأنا جالس أتسقّط أخبار الوطن العاري من ملابس الأمن،ثوب العازة قصيرعلى العراقيين وليس بوسع السيد المرحوم أن يفصّل دشداشة شاكر على مقاسه،لأن السيد شاكر لم يفكر يوما أن بوسع هذه الجثة،التي همدت ليلة أمس،أن تجمع العراقيين على عطر واحد وفستان واحد....حين قالت سهير القيسي،مذيعة العربية المملوءة بالسليكون،أن الموت غيّب القائد الضرورة للجمال بعد صراع مع الجمال قضاه المرحوم سبعين عاماًفي طاعة اللون والطعم والرائحة النسائية...قلت لزوجتي وأنا مشدود بالحزن من جهة واحدة: - ولج مات!!! - ولك منو مات؟! - إشتعل حرملة.... ولج تدرين منو مات؟ (تمطّ بشفتيها وهي مستغربة من زوجهاالذي يشبه مال الحزين!!)..قالت له: - منو مات ابويه؟ أبوك؟ أمي؟ أمك؟ اخويه؟ أخوك؟ - ولج لا...إنت بعدج كَاعدة؟ولج كَومي هزّي طولج؟ كَومي حَضْري.. - آني كلشي إمْحَضْرةْ....عندي طوْل إقماش اسود مال فواتح و(شيله سوده لونهه أحمر عتيجة...رحت بيهه لكل الفواتح بقطاعات الجوادر)....وإذا هيج المرحوم عزيز على روحك وخاف تنجرح أحاسيسك جدام أهله...أوْرُوْحْ أبوْكْ هسه أروح أحشّم الشاعرة أم جعفوري...هاي خوش تسوّي شدّة بالفواتح...بس منين إنجيب طين إنْلطّخ وجوهنه...هنا ماكو لا طين ولا سيان...خاف عيب من كَرايب المرحوم؟.. بس إنطيني حزامك الأسود أشده على بطني وأشمر عبايتي عليه وتشوف شلون مرة عندك بالبيت...أدري حزامك مال واحد يبيع ركَي لو قصّاب...زغْرليّاه... - زين ولج هذا مالكَه غير يوم يوم يموت بيه إلا بزيارة كوشنير للعراق؟ - يمه هذا منو؟ - ولج أقول المرحوم مالكَة غير هذا اليوم يموت بيه؟ اليوم كوشنير قابل نوري المالكي والرجّال جاي من فرنسا للعراق وهو فرحان...أنّوب بس لا فرنسا راح تعترض على فتح القنصليات وماراح إتْعلّم الناس فرنسي!! - آني أعرف الفرنسي ... - ولج اللغة الفرنسية إشتعل حرملة....!! - زين هسه راح يسوون فاتحة برئاسة الوزراء ماطول الوزير الفرنسي مقهور والحزن كاتله عليه؟ والله حلوة...زين شلون النسوان أيطبّن بالفاتحة بالمنطقة الخضراء؟ هماتين الجلاب الأمريكية يشمشمن بيهن؟ خوب أم فلّوحي إمخلْيه ربع كيلو عنبر جابلهياه كّرايبهه بمجلس النواب ومخليته صار الهه شهر وبعد ريحته إتْعطْ من راس الشارع...وعيب أنوب أم قدوري اول البارحة إمحفحفة وإمكَطكَطه لرجلهه العود....أكَول أبو عليوي شبيهه الزلم صايرين جنهم مثل الدواب ...عبالك جثث مال الطب العدلي....بس يوصلون للفراش يشخرون جنهم تيّوته كَايم محركهه...
- ولج ياتيّوته ياجي ام سي!...اليوم الستروين والجاغوار تعلنان حزنهم العميق على روح المرحوم...خطية العراق والله...يعني ثاني مرة يجي الحجي كوشنير للعراق ويصير هذا الحادث المؤلم...وين راح تودّي الحكومة العراقية وجهه من ساركوزي...هسه يكَول عليهه فكَر ويمكن من حزنه اليوم يطلّق مرته الثانية لأن مات أستاذها خدمة للقضية الفرنسية... - ولك هاي شبيك اليوم أبو أعليوي....شبيهه فرنسا اليوم؟ الحمد لله ماكو لاسيارة مفخخة انفجرت يم برج إيفل ولا عبوة ناسفة إنفجرت قرب اللوفر...لعد مثل حظنه يومية يصبّحنه الموت ويمسّينه بكل الشوارع...أقول خاف المرحوم جان من جيش المهدي ويمكن كوشنير جاي يفاوض الحكومة والامريكان على إطلاق سراحه؟ - أدري جيش المهدي شجابه بالوسطية؟ إنت سمعت واحد فرنسي لزموه يحارب بجيش المهدي؟بويه شو همّه الأجانب بس يحاربون ويه القاعدة...هسه لوباقين مسيحيين ويه الكاثوليك لو ويّه الي يسموهم بروستات مو أحسن إلهم من هاي الهوسة...هسه الإسلام محتاج عاريّة يحاربون بإسمه؟ - هسه غير تفهمنه منو مات ياابن الحلال؟ أنت شلعت قلبي...وآني أريد أثغب من القهر....؟ - بويه تدرين منو مات اليوم؟ - إشتعل حرملة ...منو مات؟ - ولج مات (إيف سان لوران). - أدري هذا منو؟ بالصحوة ؟بجيش المهدي؟ بفيلق عمر؟ بفيلق مي أكرم؟ أقول خاف هذا معمّم كتلوه ؟ اقول أشو لا أكو تراب بالجو ..لا صارت الدنية سودة؟ - أدري ليش آني كَلتلج مات آية الله (إيف سان لوران)؟ - زين ماتكَلي هذا منو؟ - ولج هذا من سنة 1954 وحتى البارحة سوّه فرنسه ملكة الموضة. - الموطه؟ يعني إنت هيجي مقهور على واحد جان يسوي موطه؟ لعد من مات أبو عرب جيرانه ببغداد الي حوّل مطعم فلافل أبو عرب وسواه مال موطه ومات بالانفجار بالسوق شو مابجيت عليه ولا إنقهرت عليه هيجي؟ الظاهر إنت بس تنقهر على عشايركم بالمنطقة.. - ولج ياعشاير يابطيخ...بوية إنت ماشايفه عروض الأزياء العالمية...ماشمّيتي فد يوم عطر...هذا الي يسموه ريحة مكتوب عليهه إسمه؟ - شنو هذا يكتب الفتاوى مالته على شيشة الريحة علمود الناس تتعلمهه منه؟ - إشتعل حرملة...لج هذا أبو الصبايا الفرنسيات...هسه وين يروحن؟ منو راح يحضنهن مثل الأب الروحي... كان الله بعونهن...وين يروحن هسه؟ يمكن راح ياخذن الحيطان بباريس.... - زين وين الفاتحة خاطر نروح نلاجي؟ - بويه يافاتحة؟...هذا راح يودّوه للكنيسة يصلّون عليه... - يعني بالكنايس يخلونه نطب ونلطم...خاف يقولون علينه متخلفين...؟ - ولج يالطم ياتطبير....هذولة من يبجون ...يبجون عرايه وواحد ينام فوكَـ الثاني...أنّوب ماكو شطفات عله روسهم... يمسحون إدموعهم بالكلينس وواحد بدل مايودّي جيس تمن جيس شكر للفاتحة يودّون ورود ويرشون عطر على روحه.. - يمه شني هاي الفاتحة الفاهية...آنه إذا ماأشكَـ زيجي وأخرمش خدودي وأذب سيان على روحي ماأروح للفاتحة... مات (إيف سان لوران)...ملك الموضة التي أنقذت فرنسا من ديغولها المحارب القديم ...مات بعد أن سرّح جميع الجنود الفرنسيين من حروب ديغولها وانزل مجنّدات السحر الأنثوي على أسرّة العالم الغربي والعربي،كانت الأمتار البيض التي تتحوّل إلى أكفان تلفّ الجنود العراقيين في حروب قادتهم الأسبوعية،تتحول بين يديّ إيف سان لوران إلى فراشات بيض تطير بها الأنوثة إلى أصقاع العالم،وكان السواد الذي يتحول إلى لافتات نعي وثياب حداد وحجاباً للمجاهدين الذي يلبسون السواد ومن يخفون (جهرتهم الزفرة!!) من أجل ذبح إسلامي يحمل رائحة معاوية وهارون الرشيد،كان السواد يتحول بين يديه إلى خميلة ألوان يمتزج بها اللحم الأبيض المتوسط وسواد الشامات التي تؤرّخ للعرب القدامي سبي العباد ...كان (إيف سان لوران) حجّة الله على عباده في إظهار إسلام الجمال ووجوديته،وكنّا نحن المسلمين نوجد اللون الأحمر لكي يصبغ سكاكين فتاوانا المذهبية من أجل بغداد أنظف....كان الفرنسي يحمل في عينيه غابة ألوان من العشق والهوى ،وكنا نحمل في عيوننا سيوف الخلفاء وحريم الجواري المنتظرات أن يشممن عطر الخليفة كما تشم الكلاب الأمريكية نساءنا وهن يذهبن الى المطار...كان إيف سان لوران يخرج بفرنسا وهي تتشح بالجمال والعطر بين بلدان العالم الطامث،وكنا نحن نحمل دموعنا التي هربنا بها من أوطاننا وهي تنعى الإنسانية في وطن لايهب سوى القتلة المأجورين...
|