الصفحة الرئيسية

كلمة كتابات

الكتابات المنشورة  تعبر عن رأي اصحابها

زوايـــــا

دراسات

 kitabat@kitabat.com <<<  webmaster@kitabat.com

الارشيف

كتب

3  حزيران  2008

ماتريكس 2008 - الجزء الخامس

كتابات - خميس مشيط

(الرائعة الجديدة للطغمة الحاكمة)

(إن أي تشابه في الأسماء والأماكن وطيحان الحظ الواردة في هذا الفيلم ، هو مجرد تعمد مقصود بالحرف الواحد، قذة بقذة ، ونعل بنعل)

....

المشهد السابع

يضحك الحكيم ، ويتفل على الحضور ، ويغلق الباب...

فيرجع في الزمن إلى الوراء

............

(تكتب على الشاشة : طويريج 1949 )

فيفاجأ بالفاني Terminator واگف گدامه ، يلعب دوره (سمير عبيد بعد اعتزل ارنولد شواريزنيغر حاكم كاليفورنيا، وإذا أتحبون أنبدله .. بس دزو أيميل)..

يرتجف الحكيم وتتبلل الأرض من تحته...

ويظل يطگطگ ...

- اشبيك ...

- ....

- اشبيك أحچي

- عيني يمن فدوة لعيونك الصناعية شتريد ...

- أدور على كميلة المالكي...

- يا كميلة .. يمن فدوة فدواك

- تعرف .. المالكي ؟

- أي نعم..

- هاي أمه .. واني دزتني منظمة (طايحين حظ بلا حدود) من المستقبل لاحميها من فانية مرية Terminator دزتها منظمة بقايا الشعب العراقي ..

- أي مولانا .. وصلت هي بيتها بطويريج .. دور عليها هنا ..هنا ..

- لعد أنت وعمامتك اشكبرها.. وما تندل بيت كميلة ..

- حجي اشگالولك .. أنا افتر على النسوان .. وإذا على عمامتي .. هاكياها .. البسها بلكي تندل بيتها..

- ولك .. شو لسانك طويل.. والله العظيم لوما آني مبرمج على قضية كميلة لا هسه فريت عظم بجلد .. أيا منعول الوالدين ، يلله ولّي..

ويظل الفاني يدّور بطويريج لحد مايلگه واحد مطيرچي ، يسأله عن بيت كميلة ، فيدله المطيرچي ، فيذهب الفاني ويطرق الباب ..

يفتح الباب فتطلع كميلة ومن تشوف الفاني تنسحن روحها..

يركع الفاني للگاع ويشيلها بتك أيد، ويتفل عليها، فتفيق من الصدمة ..

- ها عمي شتريد ..؟

- والله يا خالة حظي الأعور .. الجابني على الهشكول الزفرة.. بللّه بربچ .. اتصدگين ذولة الهتيلة جماعة (طايحين حظ بلا حدود) دازيني من خمسين سنة بالمستقبل ليوره، خاطر احميچ أنتِ وهذا الصخل .. وهو يشير إلى بطنها العالي المنذر بالوليد الموعود..

تهدأ كميلة .. وتلتقط أنفاسها ..

- يمة يا فاني.. آني هسه افتهمت ..

- شفتهمتي ؟

- اسولفلك

وتبدأ كميلة بقص أسطورة حملها المقدس...

- ... كان يا ماكان في قديم الزمان ..مو بعيد ، يعني قبل ثمن تشهر، چنت گاعدة ومنچبة بيت كويمل ابن أبو المحاسن رجلي ، وما چنت أخلّف.. بقيت من زواجي لحد ذاك اليوم ما خلفت ..

- اشكد بقيتي ما تخلفين .. ؟

- حوالي أسبوع  ..

- !!!!!!!!!!!!!!!!

- المهم چنت مقهورة .. اشلون  وحدة صارلها أسبوع وما خلفت... ونذرت نذر لسيد جديد طالع بالنجف اسمه (سيد محسن) ، يگولون لگف المرجعية لگف .. فگلت هذا سيد مبروك  .. گلتله بگلبي يا سيد محسن إذا خلفت واحد مو أعور مثل ابنك، نذر علي أخليه يصير أنعال لابنك... وبالليل وآني نايمة بالسطح ... لالا استغفر الله .. حتى درج ما چان عدنا .. نايمة بالحوش .. سمعت صوت واحد يكح.. آنه لبالي صوت (كويمل) رجلي، بس بعدين أتذكرت انو راح ويه أبوه يمسح جوخ بالقصر الملكي.. رجع يكح .. بصوت عالي.. درت وجهي لگيت ملچ من الملايچة طاير بالهوا حوالي مترين، وريحة الچكاير الطالعة منه تارسة الدنيا.. وجناحاته وصخة ومشرشبة والريش ماله مهلس ، ولابس قندرة لاستيك، ريحتها توصل لأبو غرگ..

آني خفت ... گتله .:

- أعوذ منك إن كنت...

گلي:

- انچبي .. انچبي .. صايرتلي مريم العذراء .. عادة أنت اشلونچ يابة ..

أنوب عوج حلگه وظل يعيب علي :

- أعوذ منك ... عابت هالچهرة..

انوب صاح بية

- اسمعي كميلة جاي أبشرچ أبشارة ...

گتله :

- بشّر..

- إذا حبلتي ... گمزي من فوگ أعلى بيت بطويريج وآنه اضمنلچ الجنة..

آني خفت ، فگلت خلني اقشمره..

- يمحفوظ .. أعلى بناية بيت أبوي المختار، أبو ناصر وما يخلي احد يصعد فوك سطح البيت ، يخاف على الطيور.. كلهن ارفليات ..

- ولچ كميلة تريد اتقشمريني .. آني عليه ابلغچ .. وادري ما راح اتسوينها .. وراح أتخلّفين واحد اتسمينه نوري .. ينگلب جواد .. ويرجع نوري.. ويضرب العراقيين بوري .. فإذا ضربهم .. ليرى السواد في عينيه وفي شفتيه وفي ولده .. فتنقطع ذريته .. كما سيفعل بصديم الشيطان ..

آني ظليت أبچي ..وسمعت الملچ وهو طاير يگول:

- يطبچ طوب..

وبعد خمستيام حسيت آني حبلت ..

وأنت هسه شايف بعينك.. هاذه شهري...

.. 

يطرق الفاني Terminator وهو يتمتم:

- ولك شنو هالقسمة السودة

.....

والتتمة تأتي .. إن شاء الله

حرر في البصرة

في الثاني من الشهر الثالث عام قادسية الجرذان المباركة

khamesmshet@yahoo.com