مرحبا بكم في كتابات
   
عدد القراءات : 1864
تقارير
آراؤهم
ثقافة

راتب المالكي كله خمس وزكاة وثواب..هاي شجاكم!!

الأربعاء، 8 أيار، 2013

هالنوب حطو عيونهم على راتب أبو سراوي..قل هو الله أحد.. عفيه عراقيين ما عدكم شغل وعمل بس شكال المالكي وشكد ياخذ راتب وشنهو صبغة الشعر اللي يستخدمها وينام وحده لو أكو من أيزيح عنه هموم العراقيه والكورد والوضع الامني الخريط.. يا جماعه نوري المالكي بحاجه الى راتب ومخصصات ونثريات وما خفي كان أعظم.. لا يابه لا .. أذا هو مكوش على خزينة ثاني أكبر دول العالم بأحتياطات النفط أذا مو الاولى.. والمفتاح مربوط بسلسله ويه الحجاب ولازكه لزك بجسمه.. تلاثه مليون دولار سنويا شيسوي بيهن.. بس المولده شهريا أربعمية ألف دينار وقسط السياره وطلع منه الخمس والزكاة وكل ليلة جمعه أيسوي عشه ثواب أهله ويوميه خطار رايحين لطويريج ورادين يمه.. جاه هو ريس وزراء العراق ولازم يوميه قاط وقميص ورباط وفانيله ولباس وجواريب وحذاء.. ولو تشوفون جم كنتور صار عند أبو سراوي هاي بس مال ولايتين ..وكناتير الولايه الثالثه بعدها مخلصانه يم النجار ..وقوط الصبح تختلف عن قوط المسى وكنتور أربطه أيشي حرير وأيشي كتان وأرقى القمصان جاه شلون غير ريس وزراء العراق بعد طيزي وأكو من أيلبسه وينزعه قابل هو عنده وكت أيشيل أيده حتى يلبس لو ينزع ويكعد يختار يا قاط ويا قميص ويا رباط ..وأبو سراوي أيضوج من البجامه أيحب الدشداشه ولازم يوميه الغبشى يجلط  لحيته .. سبحان الله من جان  بالشام بطرك القميص السمائي حتى ياخته جولكت وتغير لونه من الغسل والبنطرون صار سحاله والعرك كتله والجواريب أم الزروف وترس بطنه فول وتبوله جانت أيام سوده راحت ما ردت.. ومن توصله ليرات براس الشهر كبل أيروح على أبو الكباب والطماطه شوي..  جاه شلون بعد ينطيها..هسه لو مطي يركب مطي .. لا ويريدون المعتصمين أستقالة المالكي .. ولكم هو شاف الضيم يا أستقاله يا ضراط ..صدك جذب..
والرؤساء اللي ياخذون رواتب قليله ذوله يشتغلون من جوه العبايه وكل واحد أله حصه من المافيات وعمولات من الشركات الجبيره اللي أيسهللها العمل ولو أتحسبون رواتبهم بالسنه راح تشوفوها أكثر من عشره مليون.. على الاقل نوري المالكي ميشتغل وره الدوام ولا ياخذ بيده عمولات من الصفقات .. لا دمدمون وتتهمون الزلمه على الفاضي اللي عنده دليل أو حجه أيقدمها حتى أيسلخون جلد اللي خلفوه ..ولو تشوفون بياض أيده راح تعرفون نيته الطيبه ويه الجميع وفلوس النثريه اللي تبقى بنهاية السنه أيرجعها للخزينه حتى يستفاد منها الشعب في بناء مستشفيات ومدارس وحتى يبنون بيها مجاري لتصريف مي الامطار.. وهاي صارله أسبوع مينام وقلق على الناس اللي دمر المطر بيوتها ومزارعها وراح أيسوي لجنه أتوزع فليسات على المتضررين وموت يا زمال لمن توصل التخصيصات وهم كولو زيزي..
وبعدين تعالو نحسبها بالعدل..هاي ولايتين راح تكضي يعني ثمن سنوات وكل سنه تلاثه مليون يعني هسه أبو سراوي يملك صافي واحد وعشرين مليون دولار وشويه خرده.. وطبعا هاي الخرده الباقيه تبني هسه خمس بيوت ..أي مو كل خرده خرده ..وهسه راح أيخش بولايه ثالثه وأربع سنين وحبك أنت شكل تاني.. راح يطلع سنة 2017 وبمحصول 35 مليون دولار صافي.. أبسط يا عم.. وهاي طبعا ما عدى رواتب حمودي وأسراء وزوجها والحجيه وذوله مشغلهم بس بالاوراق وتتحول رواتبهم تماتيك الى لندن.. هذا البخت .. صدك الام من تدعي الله يستجاب دعوة الوالده.. روح الله أيوفقك.. بس شلون توفيق.. وأحنه الدعوه توصل يم توفيق الدقن وترجع منخله..خلي ياكلون مدام أبو سراوي بولايه البنجاب الثالثه..
لا تحطون عيونكم على الزلمه ليروح أيصير بيه شي وتبلونه.. حتى ربنا كال..ولا تمدن عينيك الى ما متعنا به أزواجا منهم زهرة الحياة الدنيا لنفتنهم فيه ورزق ربك خير وأبقى.. لازم البرلمان أيعدل راتب ريس الوزراء بس بحده مو رواتب النواب هماتين..أني تره ما كلت أعضاء مجلس النواب.. أذا تريدون جلسة مجلس النواب كاملة العدد وحتى النايب المكسور اللي عايش بره يجي كولو راح أيصير تعديل برواتب النواب وشوفو الخوات الكحبه أذا ميسابقون للحضور بالجلسه تعالو عاتبوني..ذوله ممثلي الشعب الخايف وخالين عيونهم على راتب نوري المالكي..اللي أختشو ماتو..وما خفي كان أعظم

 
تعليقات الفيسبوك
تنويه لابد منه : ايمانا بشعارها ( الضمير رقيب الكاتب ) " كتابات " غير مسؤولة عن محتوى تعليقات الفيسبوك المنشورة في موقعها .. ولا تعبر بالضرورة عن رأي إدارتها ويتحمل كٌتَاب التعليقات المسؤولية الأخلاقية عن محتوى تعليقاتهم .

Designed by : Enana.com
enana
Programed by : Jasmineshost.com
JasminesHost
كتابات لاتتحمل أية مسؤولية عن المواد المنشورة , ويتحمل الكتاب كامل المسؤولية عن كتاباتهم التي تخالف القوانين أو تنتهك حقوق الملكية أو حقوق الآخرين أو أي طرف آخر.